1.  ປະຫວັດ​ຄວາມ​ເປັນ​ມາຂອງ​ເມືອງ.

 ​          ເມືອງ​ໝອກ ​ເປັນ​ເມືອງ​ໜຶ່ງ​ທີ່​ຂຶ້ນ​ກັບ​ແຂວງຊຽງ​ຂວາງ, ຫ່າງ​ຈາກ​ເທດສະບານ​ແຂວງ 138 ກິ​ໂລ​ແມັດ, ​ເມືອງ​ໝອກ​ໃນ​ເມື່ອກ່ອນ​ແມ່ນ​ຂື້ນ​ກັບ​ ເມື​ງທ່າ​ໂທມ ສໍານັກ​ຕັ້ງ​ຢູ່​ປາກ​ຍອງ. ຍ້ອນ​ສະພາບ​ເສັ້ນທາງ​ຍາວ​ໄກ ​ແລະ ພື້ນ​ທີ່​ກວ້າງຂວາງ​ຫຼາຍການ​ເຄື່ອນ​ໄຫວ​ໄປມາ​ເຮັດ​ວຽກ​ງານ​ພົບ​ຄວາມ​ຫຍຸ້ງຍາກ​ບວກ​ກັບ​ສະພາບ​ສັດຕູ​ກຸ່ມ​ຄົນ​ບໍ່​ຫວັງ​ດີ​ທີ່​ມີ​ການ​ເຄື່ອນ​ໄຫວ ​ໂດຍ​ບໍ່​ມີ​ລົດ​ລະ, ຕົກ​ມາ​ຮອດ​ວັນ​ທີ 20/5/1993 ພັກ​ບລັດ​ຂັ້ນ​ເທິງ​ຈຶ່ງ​ໄດ້​ຕົກລົງ​ແຍ​ກ​ເມືອງ​ໝອກ​ອອກ​ເປັນ​ເມືອງ​ໜຶ່ງ​ຂື້ນ​ກັບ​ແຂວງ​ຊຽງ​ຂວາງ​ປະກອບມີ 5 ກຸ່ມ​ບ້ານ​ເຖິງ​ປະຈຸ​ບັນ.

    ​ເມືອງ​ໝອກ​ກໍ່​ໄດ້​ຮັບ​ການ​ພັດທະນາ​ນັບ​ມື້​ດີ​ຂື້ນ​ເປັນ​ກ້າວໆ​ໃນ​ທຸກ​ດ້ານ, ມາ​ເຖິງ​ປະຈຸ​ບັນ​ນີ້​ເມືອງ​ໝອກ​ໄດ້​ຮັບ​ບ້ານພັດທະນາ​ຈໍາວນ 10 ບ້ານ, ບ້ານ​ວັດທະນະ​ທໍາ 14 ບ້ານ, ບ້ານ​ສາທາລະນະ​ສຸກ​ແບບຢ່າງ 10 ບ້ານ ​ແລະ ບ້າ​ນອື່ນໆ​ໃນ​ປິ 2016 ກໍ່​ໄດ້​ຮັບ​ເມືອງ​ແມ່​ຍີ​ງ 3 ດີດ ກໍາມະບານ 2 ດີ 5 ​ເປັນ​ເຈົ້າ​ໃນ​ວັນ​ທີ 26/2/2016.

2.  ທີ່​ຕັ້ງ​, ພູມ​ສັນຖານ​ຂອງ​ເມືອງ.

        ​ເມືອງ​ໝອກ​ຕັ້ງ​ຢູ່​ທິດ​ໃຕ້​ຂອງ​ແຂວງ​ຊຽງ​ຊຽງ​ຂວາງ ຫ່າງ​ຈາກ​ເທດສະບານ​ແຂວງ 138 ກິ​ໂລ​ແມັດ, ມີ​ເຂດ​ແດນ​ດິດຈອດ​ຄື: ທິດ​ເໜືອ​ຕິດ​ກັບ​ເມືອງ​ຄູນ ​ແລະ ​ເມືອງ​ໜອງ​ແຮດ, ທິດ​ໃຕ້​ຕິດ​ກັບ​ເມືອງ​ວຽງ​ທອງ​ແຂວງ​ບໍລິ​ຄໍາ​ໄຊ, ທິດຕາ​ເວັນ​ອອກ​ຕິດ​ກັບ​ເມືອງ​ກິ​ເຊິ​ນ ສສ ຫວຽດນາມ ​ແລະ ທິດຕາ​ເວັນ​ຕົກ​ຕິດ​ກັບ​ເມືອງ​ທ່າ​ໂທມ​ແຂວງ​ໄຊ​ສົມບູນ. ​ເມືອງ​ໝອກ​ສ້າງຕັ້ງ​ຂຶ້ນ​ວັນ​ທີ 20/5/1993, ມີ​ເນື້ອ​ທີ່​ທັງ​ໝົດ ​3,290 ກິ​ໂລ​ຕາ​​ແມັດ, ປະ​ກອບ​ມີ 1 ຈຸດ​ສຸມ, ມີ 28 ບ້ານ, ມີ 2,236 ຫຼັງຄາ​ເຮືອນ​ມີ 2,093 ຄອບຄົວ, ມີ​ພົນລະ​ເມືອງ​ທັງ​ໝົດ 14,975 ຄົນ, ຍິງ 7,074 ຄົນ, ປະກອບ​ມີ 3 ຊົນ​ເຜົ່າ​ໃນ​ນັ້ນ: ​ເຜົ່າ​ລາວ​ລຸ່ມ​ມີ 2,583 ຄົນ, ຍິງ 1,336 ຄົນ; ​ເຜົ່າ​ມົ້ງ ມີ 11,909 ຄົນ, ຍິງ 5,441 ຄົນ ​ແລະ ​ເຜົ່າ​ກຶມ​ມຸ ມີ 303 ຄົນ, ຍິງ 167 ຄົນ. ທົ່ວ​ເມືອງ​ມີ​ເນື້ອທີ່ນາ​ທັງ​ໝົດ 1,119.7 ​ເຮັກ​ຕ່າ, ​ເມືອງ​ໝອກ​ເປັນ​ເມືອງ​ພູດ​ອຍ ການ​ຕັ້ງ​ບ້ານ​ເຮືອ​ນຂອງ​ປະຊາຊົນ​ແມ່ນ​ກະ​ແຈກ​ກະຈາຍ​ເສັ້ນທາງ​ໄປມາ​ຫາ​ກັນ​ລະຫວ່າງ​ບ້ານຕໍ່​ບ້ານ​ແມ່ນ​ຂຶ້ນ​ພູ​ລົງ​ຫ້ວຍ ​ແລະ ​ເປັນ​ທາງ​ປູ​ແຮ່, ​ໃນ​ລະດູ​ຝົນ​ການ​ໄປມາ​ຫາ​ກັນ​ບ້ານ​ຕໍ່ບ້ານ​ພົບ​ຄວາມ​ຫຍຸ້ງຍາກ​ຫຼາຍ.